31 iyul-2 avqust 2024-cü il tarixlərində Azərbaycan Qızıl
Aypara Cəmiyyəti Azərbaycan Respublikasının
Minatəmizləmə Agentliyi və Azərbaycan Respublikası Qaçqınların və Məcburi
Köçkünlərin İşləri üzrə Dövlət Komitəsi ilə birgə əməkdaşlıq
çərçivəsində "Risklər barədə maarifləndirmə və təhlükəsiz davranış"
mövzusunda silsilə maarifləndirmə sessiyalarını Füzuli və digər bölgələrdə
davam etdiririk.
Maarifləndirici sessiyaların keçirilməsində
əsas məqsəd “İşğaldan azad edilmiş ərazilərə Böyük Qayıdışa dair” I Dövlət
Proqramının icrası çərçivəsində Füzuli şəhərinə köçürülmüş sakinlərə mina və
partlamamış hərbi sursatlarla (PHS) bağlı məlumatların verilməsi və onların hələ
də mövcud təhlükələrdən qorunmasını təmin etməkdir.
Növbəti mərhələdə sessiyalar
Füzuli şəhəri ərazisində artıq məskunlaşmış əhali qrupu üçün təşkil
olunub. "Qapı-qapı” formatında keçirilən maarifləndirici sessiyaları
AzQAC-ın Miqrasiya şöbəsinin müdiri, Silahlara qarşı mübarizə layihəsinin koordinatoru
Məmməd Kətanov, koordinator müavini Renat Vəliyev və Cəmiyyətin təlim keçmiş 12
nəfər könüllüsündən ibarət heyəti tərəfindən gerçəkləşdirilib. “Qapı-qapı”
sessiyasında təlimçilər mənzillərə gedərək ailə üzvlərinə zəruri məlumatlar
verib, onların suallarını cavablandırıblar.
Maarifləndirmə sessiyalarında xəbərdaredici və məlumatlandırıcı
nişanlar, mina təhlükələrindən qorunmaq barədə məlumatlar verilib. Daha sonra
maarifləndirici broşürlər paylanılıb, aidiyyatlı əyani vəsaitlərdən istifadə edilib,
təhlükə zamanı müraciət edilə biləcək dövlət qurumları və əlaqə vasitələri
xatırladılıb.
Mina və PHS təhlükəsi ilə bağlı maarifləndirici 11172 sessiya üzrə
ümumilikdə 27161 nəfər əhali qrupu sessiyalardan bəhrələnmişdir. Bütün bu
fəaliyyətlərin davamı olaraq digər ərazilərdə də bu yönümlü sessiyalar həyata
keçirilməsi nəzərdə tutulub. Görülən işlər əhali tərəfindən böyük rəğbətlə
qarşılanıb. Uğurlu fəaliyyətin baş tutmasında göstərdiyi hərtərəfli dəstəyə görə
Azərbaycan Qızıl Aypara Cəmiyyətinin prezidenti cənab Novruz Aslanova, layihənin
bütün iştirakçıları adından öz dərin təşəkkürümüzü bildiririk. Məhz onun
işgüzar münasibətlərinin sayəsində hökumət və dövlət qurumları ilə səmərəli əməkdaşlıq
qurulmuş, gələcək fəliyyətlər üçün geniş imkanlar yaradılmışdır.
Növbəti mərhələdə AzQAC və ANAMA ilə birgə əməkdaşlıq çərçivəsində
ANAMA mütəxəsissləri tərəfindən Cəmiyyətin könüllüləri üçün partayıcı
sursat təhlükəsinə dair maarifləndirmə (PSTM) üzrə təlimçilər üçün təlim təşkil
etməyi planlaşdırır. Bu günə qədər Qızıl Aypara Cəmiyyətnin 200
yaxın könüllüsü üçün təşkil edilmiş bütün təlimlərə görə ANAMA Agentliyinin rəhbərliyinə
və təlimçilərə öz təşəkkürümüzü bildiririk.
Eyni zamanda bildirik ki, ANAMA Agentliyi ilə Əməkdaşlıq dərin köklərə söykənir.
Bü müddət ərzində ən etibarlı tərəfdaş kimi birgə fəaliyyətlərə hərtərəfli dəstək
göstərir.
