Sağlamlıq imkanları məhdud uşaqlar üçün xüsusi məktəbdə “Əl-ələ verək, birgə sevinək” adlı xüsusi bayram tədbiri təşkil olunub

1 iyun Uşaqların Beynəlxalq Müdafiəsi Günü münasibətilə Sumqayıt şəhərində sağlamlıq imkanları məhdud uşaqlar üçün “Əl-ələ verək, birgə sevinək” adlı xüsusi bayram tədbiri təşkil olunub. Tədbiri açan  məktəbin direktoru Arzu Alızadə çıxışında qonaqları salamlayıb, tədbirin əhəmiyyətindən bəhs edib, sonda  uşaqlara ən xoş arzularını çatdırıb. Daha sonra məktəbin kollektivi tərəfindən hazırlanan musiqi nömrələri ilə cıxış edən şagirdlərin performansları iştirakcıların ürəyincə olub. Azərbaycan Qızıl Aypara Cəmiyyətinin Sumqayıt Regional Mərkəzinin koordinatoru Mətanət Məhərrəmova çıxış edərək, uşaqları bu əlamətdar gün münasibətilə təbrik edib   hər zaman onların yanında olduqlarını vurğulayıb. O, bildirib ki, hər zaman olduğu kimi bu dəfə də Millət Vəkilimiz Səbinə Salmanovanın təşəbbüsü ilə hazırladıqları hədiyyələrlə sizə pənah gətirmişik. Xüsusi sağlamlıq imkanları məhdud olan uşaqlarla Millət Vəkilləri Səbinə Salmanova və Elnarə Akimova və tədbirə qoşulan  digər rəsmi qonaqlar Sumqayıt Şəhər İcra Hakimiyyətinin nümayəndəsi Mehriban Nəcəfova, Azərbaycan Qızıl Aypara Cəmiyyətinin (AzQAC) İcraçı katibinin müavini Xalidə İsgəndərova, və QAC Sumqayıt şəhər  bölmə sədri Şəhriyar Əliyev, Abşeron-Xızı Regional Təhsil İdarəsinin Sumqayıt sektorunun müdiri İman Ağayev və Poeziya Evinin direktoru İbrahim İlyaslı rəqs edərək,onlara xoş əhval-ruhiyə bəxş ediblər.Tədbirin sonunda AzQAC-ın Sumqayıt şəhər bölməsinin könüllüləri tərəfindən məktəbin şagirdlərinə bayram hədiyyələri təqdim olunub. Bu cür tədbirlər cəmiyyətin diqqətini uşaqların rifahına, onların sosial müdafiəsinə yönəltmək və sağlamlıq imkanları məhdud uşaqlara dəstək məqsədi daşıyır. Məktəb rəhbərliyinə yaratdıqları imkan üçün minnətdarlığımızı bildiririk.