FHN-nin Sumqayıt Regional Mərkəzi və AzQAC-ın Sumqayıt şəhər regional mərkəzi ilə birgə 1 İyun “Uşaqların Beynəlxalq Müdafiəsi Günü” münasibətilə “açıq qapı günü” tədbiri keçirib

Azərbaycan Respublikası Fövqəladə Hallar Nazirliyi Sumqayıt Regional Mərkəzi tərəfindən 1 İyun  “Uşaqların Beynəlxalq Müdafiəsi Günü” münasibətilə “açıq qapı günü” tədbiri keçirilib. Tədbirin keçirilməsində məqsəd uşaqların hərtərəfli inkişafı, fiziki və mənəvi cəhətdən sağlam olması, onlarda təhlükəsiz həyat fəaliyyəti mədəniyyətinin formalaşdırılması, habelə Nazirliyin məqsəd və vəzifələri haqqında məlumatlandırılması olub. Həmçinin, tədbirə öncə  Azərbaycan Respublikasının Dövlət Bayrağı meydana gətirilib, Dövlət Himni səsləndirilib, ölkəmizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib. Tədbiri çıxış sözü ilə açan FHN Sumqayıt Regional Mərkəzinin rəisi polkovnik Vaqif Fətullayev bu əlamətdar gün münasibətilə uşaqları təbrik edərək bu günün tarixi əhəmiyyətindən, ölkəmizin qoşulduğu beynəlxalq Konvensiyalar və qanunvericilik aktları barədə söz açıb. Mərkəz rəisi bildirib ki, ölkəmizdə uşaqların ən böyük himayədarı Ulu öndər Heydər Əliyev olmuş, dövlət siyasətinin ən vacib istiqamətlərindən biri kimi böyüməkdə olan nəslin sağlam, firavan, xoşbəxt yaşamasını göstərib. Tədbirdə AzQAC-ın Sumqayıt Regional Mərkəzinin koordinatoru Mətanət Məhərrəmova öz çıxışında tədbirdə göstərilən fəal iştiraka görə təşəkkür edib və gələcəkdə də belə bir tədbirlərin keçirilməsinin vacibliyini vurğulayıb.  Həmçinin, ölkə başçısı İlham Əliyevin, Birinci vitse-prezident Mehriban xanım Əliyevanın rəhbərliyi altında bu istiqamətdə mühüm addımlar atıldığını, böyük işlər görüldüyünü tədbir iştirakçılarının diqqətinə çatdırıb. Daha sonra tədbir musiqi nömrələri, ədəbi-bədii kompozisiyalar, səhnəcik və rəqslərlə davam edib. “Açıq qapı günü”ndə uşaqlara FHN Sumqayıt Regional Mərkəzinin, Kiçikhəcmli Gəmilərə Nəzarət və Sulara Xilasetmə Dövlət Xidmətinin, Sumqayıt şəhər Dövlət Yanğından Mühafizə İdarəsi tərəfindən yanğınsöndürmə və xilasetmə texnikası və avadanlıqları təqdim olunub, xilasedicilərin gündəlik iş fəaliyyəti barədə məlumat verilib, uşaqların sualları cavablandırılıb. Uşaqların iştirakı ilə keçirilən kiçik oyunlar təlim isə onlarda böyük marağa səbəb olub. Tədbir çərçivəsində, eləcə də şagirdlər üçün viktorina təşkil edilib və qalib şagirdlərə Fəxri Fərmanlar təqdim edilib. Sonda uşaqlara hədiyyələr təqdim olunub, xatirə şəkli çəkdirilib.