Beynəlxalq Aypara İslam Komitəsinin AzQAC-a məktubu

 
Kimə:
- İslam Əməkdaşlıq Təşkilatının Baş Katibliyinə
- Milli Qızıl Aypara və Qızıl Xaç Cəmiyyətlərinə 
- İslam Əməkdaşlıq Təşkilatına üzv dövlətlərə.
Tarix: 18.09.2023
 
Beynəlxalq Aypara İslam Komitəsi (ICIC) sizə ən xoş arzularını bildirir və Azərbaycan Qızıl Aypara Cəmiyyətinin qırx tona yaxın un həcmində ərzaq məhsulları da daxil olmaqla humanitar yardımı Azərbaycanın Qarabağ iqtisadi regionunda yerləşən erməni əsilli sakinlərə Cəmiyyətin əməkdaşları və ayrılmış könüllüləri vasitəsilə çatdırmaqla humanitar yardım göstərmək təşəbbüsü ilə bağlı bəyanatını bu məktuba əlavə etməkdən şərəf duyur. Bu yardımın çatdırılması Azərbaycan Respublikası ərazisində Ağdam-Xankəndi marşrutu ilə həyata keçiriləcək.
Beynəlxalq Aypara İslam Komitəsi Azərbaycan Qızıl Aypara Cəmiyyətinə dəstəyini və onun bu humanitar yardımı Azərbaycanın milli qanunvericiliyi çərçivəsində və Beynəlxalq Qızıl Xaç və Qızıl Aypara Hərəkatının prinsiplərinə, xüsusilə heç bir ayrı-seçkilik olmadan erməni əsilli sakinlərə qarşı yönəlmiş neytrallıq, qərəzsizlik, birlik və humanizm prinsiplərinə uyğun olaraq, habelə humanitar iş sahəsində İslam Əməkdaşlıq Təşkilatı üzvü ölkələrin Beynəlxalq Qızıl Xaç və Qızıl Aypara Cəmiyyətləri ilə əməkdaşlıq və koordinasiya sahəsindəki beşinci məsləhət görüşünün nəticələrinə əsasən göstərdiyini təsdiqləyir.
Komitə bu məsələdə Azərbaycan Qızıl Aypara Cəmiyyətinə dəstəyini və bu istiqamətdə hər cür yardım göstərməyə hazır olduğunu bildirir.
Komitə ümid edir ki, bütün aidiyyəti tərəflər yuxarıda qeyd olunanları nəzərə alacaq və Azərbaycan Qızıl Aypara Cəmiyyətinin həyata keçirdiyi humanitar işlərə dəstək ifadə edəcəklər.
Beynəlxalq Aypara İslam Komitəsi (ICIC) bu fürsətdən istifadə edərək Sizə öz dərin minnətdarlığını və ehtiramını  bildirir.
 
 
 
 
 
 
 
Azərbaycan Qızıl Aypara Cəmiyyətinin  Bəyanatı
            Azərbaycan Qızıl Aypara Cəmiyyəti (AzQAC) 1920-ci ildən etibarən 100 ildən artıq bir müddətdə, Beynəlxalq Qızıl Xaç və Qızıl Aypara Hərəkatının tərkib hissəsi olaraq, Beynəlxalq Hərəkatın 7 fundamental prinsipini, xüsusilə “bitərəflik”, “qərəzsizlik”, “vahidlik” prinsiplərini rəhbər tutaraq, həm sülh dövründə, həm hərbi münaqişələr şəraitində, eyni zamanda fövqəladə hallar zamanı dini etiqadından, milli mənsubiyyətindən, irqindən, siyasi baxışlarından asılı olmayaraq, fərq qoymadan müharibə qurbanlarına, məcburi köçkün və qaçqınlara, minadan zərərçəkmişlərə və digər ehtiyaclı insanlara zəruri humanitar yardımlar göstərir.
Birinci Qarabağ və Vətən müharibəsi zamanı, COVİD-19 pandemiyası dövründə AzQAC Beynəlxalq Qızıl Xaç Komitəsi və Beynəlxalq Qızıl Xaç və Qızıl Aypara Cəmiyyətləri Federasiyası ilə sıx əməkdaşlıq çərçivəsində zərərçəkmiş  şəxslərə müvafiq humanitar yardımlar göstərmişdir. 30 illik fəaliyyətləri dövründə hər iki beynəlxalq qurum respublikada humanitar sahədə kifayət qədər müxtəlif layihələr həyata keçirmişlər.Son zamanlar Azərbaycan Respublikasının Qarabağ bölgəsində yaşayan erməni sakinlərin humanitar ehtiyacları mövzusu ətrafında bir kampaniyanın şahidi oluruq.
Bunu nəzərə alaraq, Azərbaycan Qızıl Aypara Cəmiyyəti bəyan edir:
1.         Azərbaycan Respublikasının Konstitusiyasına;
2.         “Azərbaycan Qızıl Aypara Cəmiyyəti haqqında” Azərbaycan Respublikasının Qanununun 3.0.1; 3.0.8; 3.0.9 maddələrinə;
3.         “Qızıl Xaç və Qızıl Aypara Emblemlərindən istifadə və onların müdafiəsi haqqında” Azərbaycan Respublikasının Qanununun 6; 9; 15 maddələrinə;
4.         Azərbaycan Qızıl Aypara Cəmiyyətinin Nizamnaməsinə;
5.         Beynəlxalq Hərəkatın “vahidlik” prinsipinə;
6.         Beynəlxalq Federasiyanın Konstitusiyasına uyğun olaraq
Cəmiyyət mandatına uyğun olaraq, əməkdaşlarının və könüllülərinin köməyi ilə Ağdam-Xankəndi yolu ilə zəruri ərzaq, tibbi ləvazimat, dərman preparatları, geyim və s. ilə təchiz olunmuş istənilən humanitar yükün erməni sakinlərə çatdırmasına dəstək verməyə hazırdır. Belə ki, bu humanitar missiyanı həyata keçirmək həm milli qanunvericiliyin, həm də Cenevrə konvensiyaları və ona edilmış əlavələrin, həmçinin, 1997-ci ildə qəbul edilmiş Seviliya Razılaşmasına 2022-ci ildə edilmiş müvafiq dəyişikliyin tələblərinə tam uyğundur. Həmin dəyişikliyə əsasən, humanitar yardımların həyata keçirilməsində aparıcı rol milli cəmiyyətlərə verilir.
Bu humanitar missiyanın həyata keçirilməsi üçün, milli cəmiyyət olaraq Azərbaycan Qızıl Aypara Cəmiyyətinin bütün potensialı səfərbər olunmuşdur. 
Bu Bəyanat Azərbaycan Qızıl Aypara Cəmiyyətinin İdarəetmə Şurasının 21 avqust 2023-cü il tarixli geniş iclasında qəbul olunmuşdur.