Yeni çağırışlara hazırlıq

 
Azərbaycan Qızıl Aypara Cəmiyyəti (AzQAC) ölkədaxili humanitar layihələrin həyata keçirilməsində, xüsusilə icma əsaslı layihələr çərçivəsində ehtiyacların qarşılanması məqsədilə respublikanın müxtəlif bölgələrində həssas qruplara fərq qoymadan zəruri humanitar yardımlar göstərir. Humanitar layihələr Beynəlxalq Qızıl Xaç və Qızıl Aypara Hərəkatının (Beynəlxalq Hərəkat) fundamental prinsiplərinə uyğun olaraq həyata keçirilir. Bu sahədə Beynəlxalq Hərəkatın komponentləri- Beynəlxalq Qızıl Xaç Komitəsi, Beynəlxalq Qızıl Xaç və Qızıl Aypara Cəmiyyətləri Federasiyası və milli cəmiyyətlər qarşılıqlı əməkdaşlıq şəraitində koordinasiya edilmiş şəkildə birgə fəaliyyət göstərirlər. 

Bu gün AzQAC mövcud vəziyyətə və şəraitə uyğun olaraq, missiyası çərçivəsində yeni çağırışlara münasibətində çevikliyin və dayanıqlığın təmin edilməsi, həmçinin zəruri olan ehtiyacların qarşılanması üçün bütün potensialını səfərbər edib. Milli cəmiyyət Qarabağ İqtisadi Rayonunda icma əsaslı layihələr çərçivəsində yerli sakinlərlə ünsiyyətin qurulması, ehtiyaclarının qiymətləndirilməsi, humanitar yüklərin təşkili, çatdırılması və paylanılması işində öz xoşməramlı niyyətini ortaya qoyub. Bu xoşməramlı niyyətin həyata keçirilməsi üçün AzQAC öz mandatına uyğun olaraq bütün lazımi dəstəyi verməyə tam hazırdır. Milli cəmiyyətin bu sahədə kifayət qədər təcrübəyə malik əməkdaşları var, xüsusilə beynəlxalq standartlar səviyyəsində hazırlanmış Fövqəladə Mobil Könüllü Dəstələr öz bilik və bacarıqları ilə ilk yardım və digər zəruri humanitar əməliyyatları həyata keçirmək qabiliyyətinə malikdirlər.

Eyni zamanda müvafiq hökumət strukturları ilə qarşılıqlı işgüzar əməkdaşlıq barədə memorandumlar mövcuddur və AzQAC fəaliyyəti zamanı əlaqədar qurumlar tərəfindən dəstəklənir.  

Bu fəaliyyət istiqamətində ənənəvi tərəfdaşlarımızın da humanitar dəyərlər və prinsiplər çərçivəsində xoş niyyətləri tərəfimizdən qiymətləndiriləcək. AzQAC bu sahədə əməkdaşlığa açıqdır.

Beynəlxalq Humanitar hüquqa əsaslanan fəaliyyətimiz, həmçinin milli qanunvericiliyə, Cenevrə Konvensiyaları və ona əlavə edilmiş protokollara, Sevilya razılaşmasına tam olaraq uyğundur.

Ümid edirik ki, əlaqələndirilmiş şəkildə həyata keçirilən humanitar layihələr əhalinin sosial müdafiəsinin gücləndirilməsi sahəsinə öz töhfəsini verəcəkdir.