Azərbaycan Qızıl Aypara Cəmiyyəti və BQXK təşkilatçılığı ilə AzQAC-nin könüllülərinə təlim təşkil edilib

18-21 dekabr 2023-cü il tarixlərində Şəmkir şəhərində Azərbaycan Qızıl Aypara Cəmiyyətinin Tərtər, Ağdam, Cəbrayıl, Füzuli, Xocavənd şəhər və rayon bölmələrinin könüllülərinə  Beynəlxalq Qızıl Xaç komitəsinin ekspertləri tərəfindən 4 günlük “Mina və partlamamış hərbi sursatların yaratdığı təhlükələr” mövzusunda təlim təşkil edilib.
Tədbirin  məqsədi könüllülərin bilik və bacarıqlarının artırılması, gələcək fəaliyyətlərdə peşəkarcasına əhali arasında maarifləndirmə işlərinin həyata keçirmələrinə dəstək olmaqdan ibarət olub.  Eyni zamanda yeni könüllülərin növbəti təlimlərə cəlb olunması məqsədilə hazırlıq işlərinin davamlı aparılması üçün tövsiyə xarakterli müzakirələrin aparılması nəzərdə tutulub. Növbəti mərhələdə hazılıq keçmiş könüllülərin sayının 300 nəfərə çatdırılması hədəf olaraq qarşıya qoyulub. Onu da qeyd etmək lazımdır ki, artıq 129 nəfər mina təhlükəsizliyi üzrə təlim keçmiş gənc könüllülər növbəti ildən bu yönümlü fəaliyyətlərdə iştirak edəcəklər. Qeyd edilən fəaliyyətlərin həyata keçirilməsində AzQAC-nin prezidenti, Milli Məclisin deputatı cənab Novruz Aslanov lazımi dəstək göstərərək müvafiq tapşırıq vermiş, məsələnin aktuallığını daima diqqətdə saxlamağı tövsiyə etmişdir.
AzQAC rəhbərliyinin BQXK ilə birgə apardığı müzakirələr nəticəsində müəyyən edilmiş istiqamətlər üzrə fəaliyyətlər hal-hazırda aidiyyatlı bölgələr üzrə icra edilməkdədir.
Tədbirdə Cəmiyyətin Silahlara Qarşı Mübarizə proqramının koordinatoru Məmməd Kətanov, BQXK-nın Silahların Yaratdığı Təhlükələr proqramının Bərdə nümayəndəliyinin koordinatoru Fidel Etsora, Silahların Yaratdığı Təhlükələr şöbəsinin  əməkdaşları  Nicat Məmmədov, Rövşən Hümbətov və Çingiz Rəhmanov  iştirak ediblər.
Tədbirin sonunda iştirakçılara Beynəlxalq Qızıl Xaç Komitəsi tərəfindən şəhadətnamələr təqdim olunub. Sonda iştirakçılarla birlikdə xatirə şəkili çəkilib.