Mina və hərbi sursatların təhlükələrinə qarşı maarifləndirmə sessiyalarımız davam edir

 7-11 oktyabr 2024-cü il tarixlərində  Sumqayıt, Füzuli, Tovuz və Bərdə şəhərində keçmiş məcburi köçkünlərin müvəqqəti məskunlaşdığı  yataqxanalarda, qəsəbələrdə məcburi köçkün məktəblərində "Risklər barədə maarifləndirmə və təhlükəsiz davranış" mövzusunda mina təhlükəsinə dair təlim keçirilib. Təlim Azərbaycan Qızıl Aypara Cəmiyyətinin, Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi və Anama Agentliyi ilə  birgə əməkdaşlıq çərçivəsində təşkil edilib. AzQAC-ın mütəxəssis və könüllülərindən ibarət heyət tərəfindən  adı çəkilən qəsəbələrdə, yataqxanalarda “Qapı-qapı” və məktəb formatında keçirilən təlimlərin əsas məqsədi işğaldan azad edilmiş ərazilərə böyük qayıdışa dair I dövlət proqramının icrası çərçivəsində geri qayıdacaq sakinlər arasında mina və partlamamış hərbi sursatlarla (PHS) bağlı məlumatlılığı artırmaq, mümkün risk faktorunu minimuma endirməkdir. Təlimçilər hər bir mənzilə və məktəblərə gedərək sakinlərə, şagirdlərə  zəruri məlumatlar verib, onların suallarını cavablandırıblar. Təlimlər zamanı qadağanedici, xəbərdaredici və məlumatlandırıcı nişanlar, təhlükə zamanı müraciət edilə biləcək dövlət qurumları və əlaqə vasitələri barədə ətraflı məlumatlar verilib, maarifləndirici broşürlər paylanılıb. Ümumilikdə, fəaliyyətlər ərzində Sumqayıt şəhəri,Bərdə,Tovuz və Fizuli rayonları  üzrə həftə ərzində ümumilikdə 4675 nəfərdən çox keçmiş məcburi köçkün və ərazidə yaşayan digər sakinlər maarifləndirilib. Bu fəaliyyətlərin həyata keçirilməsində göstərdikləri hərtərəfli dəstəyə görə Azərbaycan Respublikası qaçqınların və məcburi köçkünlərin işləri üzrə Dövlət Komitəsi və Anama Agentliyinin rəhbərliyinə Azərbaycan Qızıl Aypara Cəmiyyətinin rəhbərliyi, üzvləri və könüllüləri adından dərin təşəkkürümüzü bildirilib. Ümid edirik ki, bundan sonrakı fəaliyyətlərdə  də səmərəli əməkdaşlığımız uğurla davam etdiriləcəkdir.