AzQAC könüllüləri Tovuz rayonunda Yol Hərəkəti Təhlükəsizliyi təlimi keçiriblər

“Fövqəladə hallar zamanı təhsilə giriş” layihəsi çərçivəsində Beynəlxalq Qızıl Xaç və Qızıl Aypara Cəmiyyətləri Federasiyasının dəstəyi ilə 27 noyabr 2024-cü il tarixində Azərbaycan Qızıl Aypara Cəmiyyəti  tərəfindən Tovuz rayonunun Nəsrəddin Tusi adına məktəb liseyində məktəbli uşaqlara və müəllimlərə yol hərəkəti təhlükəsizliyi ilə bağlı təlim keçirilib. Təlimdə AzQAC-ın könüllüləri məktəb heyətinə yol hərəkəti nişanları, piyadaların yolda təhlükəsiz davranış qaydaları, potensial risk faktorları və bu riskləri azaltmaq üçün görülməsi gərəkən tədbirlər barədə məlumat veriblər. Təlimin əsas məqsədi həm də məktəbli uşaqlara yol hərəkəti təhlükəsizliyi barədə maarifləndirmə işini daha da təkmilləşdirmək olub. Təlim zamanı uşaqlarla birgə yollarda qarşılaşa biləcək situasiyaları anlamağa və bu vəziyyətlərə düzgün reaksiya verməyə yönələn öyrədici oyunlar və praktiki məşğələlər təşkil edilib. Bu fəaliyyətlər uşaqların həm nəzəri, həm də praktiki biliklər əldə etməsinə kömək edib.