AzQAC-ın Baş Qərargahında üçtərəfli görüş keçirilib

31 yanvar 2025-ci il tarixində Azərbaycan Qızıl Aypara Cəmiyyətinin Baş Qərargahında Azərbaycan Qızıl Aypara Cəmiyyəti, Beynəlxalq Qızıl Xaç Komitəsi və Beynəlxalq Qızıl Xaç və Qızıl Aypara Cəmiyyətləri Federasiyası (BQXQACF) arasında üçtərəfli görüş keçirilib.
Görüşdə Qızıl Aypara Cəmiyyətinin vitse-prezidenti Qafar Əsgərzadə, Baş katib Ceyhun Mirzəyev, İnformasiya və İctimaiyyətlə əlaqələr şöbəsinin əməkdaşları, Milli Cəmiyyətin İnkişafı üzrə nümayəndəsi Aleksandr Mordovin, BQXK-nin Azərbaycan nümayəndəliyinin İctimaiyyətlə əlaqələr şöbəsinin rəhbəri İlahə Hüseynova, BQXK-nin Azərbaycan nümayəndəliyinin Əməkdaşlıq şöbəsinin koordinatoru Muhammad Zubair Xan və digər əməkdaşlar iştirak ediblər.
Tədbiri açan vitse-prezident Qafar Əsgərzadə iştirakçıları salamlayaraq bu görüşün tərəflər arasında əməkdaşlığın daha səmərəli qurulması baxımından vacibliyini vurğulayıb. O, çıxışında AzQAC-ın fəaliyyəti, humanitar sahədə görülən işlər və qarşıda duran prioritetlər haqqında ətraflı məlumat verib.
Görüşdə əsas müzakirə mövzularından biri Azərbaycan Qızıl Aypara Cəmiyyətinin 10 mart 2025-ci ildə qeyd ediləcək 105 illik yubileyi olub. Bu çərçivədə həyata keçirilməsi planlaşdırılan tədbirlər, aksiyalar və kampaniyalar, onların təşkilati və texniki detalları nəzərdən keçirilib. Yubiley tədbirlərinin daha geniş auditoriyaya çatdırılması üçün kütləvi informasiya vasitələrinin, o cümlədən televiziya və radio kanallarının, eləcə də sosial şəbəkələrin aktiv istifadəsi məsələsi müzakirə olunub.
Bundan əlavə, görüş zamanı Bakı şəhərində və bölgələrdə AzQAC-ın yerli bölmələrinin yubiley tədbirləri çərçivəsində daha aktiv fəaliyyət göstərməsi üçün görüləcək addımlar müzakirə edilib. Baş katib Ceyhun Mirzəyev qeyd edib ki, yubiley tədbirləri təkcə mərkəzi səviyyədə deyil, həm də regionlarda geniş şəkildə təşkil olunmalıdır. O, bildirib ki, hər bir yerli bölmə bu prosesdə fəal iştirak etməli və cəmiyyətin tarixi irsini, humanitar fəaliyyətini ictimaiyyətə daha yaxından tanıtmalıdır.
Görüşdə tərəflər gələcəkdə daha sıx əməkdaşlıq etmək və humanitar fəaliyyətin gücləndirilməsi istiqamətində birgə layihələr həyata keçirmək barədə razılığa gəliblər. BQXK və BQXQACF nümayəndələri çıxışlarında qeyd ediblər ki, Azərbaycan Qızıl Aypara Cəmiyyəti regionda mühüm humanitar missiyanı yerinə yetirir və onun fəaliyyətini daha da gücləndirmək üçün beynəlxalq tərəfdaşlar daim dəstək verməyə hazırdırlar.
Sonda vitse-prezident Qafar Əsgərzadə görüşün bütün iştirakçılarına təşəkkür edərək belə müzakirələrin mütəmadi olaraq keçirilməsinin əhəmiyyətini vurğulayıb.