Az.QAC Sumqayıt şəhər bölməsində “Qızıl Aypara 105 il şagirdlərin gözü ilə” adlı rəsmlərə baxış keçirilib

AzQAC Sumqayıt Regional Mərkəzinin təşkilatçılığı ilə Azərbaycan Qızıl Aypara Cəmiyyətinin 105 illik yubileyinə həsr olunmuş “Qızıl Aypara 105 il şagirdlərin gözü ilə” adlı Sumqayıt şəhər ümumtəhsil məktəbləri arasında keçirilən rəsm müsabiqəsinin qaliblərini müəyyən etmək üçün komissiya yaradılıb. Komissiyaya Sumqayıt Rəsm Qaleriyasının direktoru, Azərbaycan Rəssamlar İttifaqının üzvü Ellada Həsənova, Əməkdar Mədəniyyət işçisi Fazil Abbasquluzadə, Fəxri Mədəniyyət işçisi Nəsibə Şükürova, Azərbaycan Rəssamlar İttifaqının və Beynəlxalq Sulu Boya Cəmiyyətinin üzvü, Sumqayıt nümayəndəliyinin rəhbəri İntiqam Cəfərov və Azərbaycan Rəssamlar İttifaqının üzvü Tofiq Əhmədov da daxil olmuşdu.
Şagirdlərin çəkdiyi rəsmlərə baxış keçirilmiş, fikir mübadiləsi aparılmış və qaliblər ilə fəal iştirakçılar müəyyən olunmuşdur. Regional Mərkəzin koordinatoru Mətanət Məhərrəmova, qalibləri müəyyən etmək üçün dəvəti qəbul edən incəsənət xadimlərinə öz adı və Sumqayıt şəhər bölməsinin əməkdaşları adından təşəkkürlərini bildirib. Yaxın günlərdə keçiriləcək Yubiley müsabiqəsində qaliblər diplom, iştirakçı sertifikatı və hədiyyələrlə təltif olunacaqlar.