AzQAC-ın prezidenti Cənab Novruz Aslanovdan Türk Kızılaya təbrik məktubu

Türk Qızıl Aypara Cəmiyyətinin Prezidenti,
Dr. Fatma Meriç Yılmaz xanım,
 
Sizi Azərbaycan Qızıl Aypara Cəmiyyətinin bütün əməkdaşları, üzvləri və könüllüləri adından səmimi qəlbdən salamlayır və Türk Qızıl Aypara Cəmiyyətinin şərəfli 157-ci ildönümü münasibətilə Sizi və rəhbərlik etdiyiniz kollektivinizi ürəkdən təbrik edirəm.
157 illik zəngin tarixə malik olan Türk Qızıl Aypara Cəmiyyəti, Beynəlxalq Humanitar dəyərlərə sadiqliyi, ehtiyac içində olan insanlara göstərdiyi mərhəmət, dəstək və yardımlarla bütün dünyada nümunəvi bir Milli Cəmiyyət kimi tanınır. Bu böyük missiyanın uğurla həyata keçirilməsində Sizin liderliyiniz, təşkilatın əməkdaşlarının və könüllülərinin fədakar əməyi danılmazdır.
Azərbaycan və Türkiyə yalnız ortaq tarix, mədəniyyət və dilə malik iki dost ölkə deyil, eyni zamanda sarsılmaz qardaşlığı ilə bir-birinə bağlı, hər zaman bir-birinin yanında olan iki dövlət və xalqdır. Xüsusilə 2020-ci ildə baş vermiş 44 günlük Vətən müharibəsi zamanı Azərbaycan xalqı növbəti dəfə ciddi sınaqdan keçdi. Həmin ağır günlərdə Türk Qızıl Aypara Cəmiyyətinin göstərdiyi həmrəylik və praktiki dəstək, Azərbaycan xalqının yaddaşında dərin iz qoydu. Sizin bu çətin dönəmdə yanımızda olmağınız və yardımınız yalnız humanitar dəstək deyil, eyni zamanda güclü mənəvi bir dayaq idi. Bundan əlavə, COVID-19 pandemiyası dövründə də Türk Qızıl Ayparasının Azərbaycan Qızıl Aypara Cəmiyyətinə verdiyi dəyərli dəstək və həmrəylik unudulmazdır. Türk Qızıl Ayparasının vaxtında göstərdiyi yardım, bu qlobal çətinlik dövründə Azərbaycanın cavab tədbirlərini gücləndirməkdə və həssas icmalara çatmaqda mühüm rol oynadı. Türk Qızıl Ayparasının təqdim etdiyi humanitar yardım, texniki dəstək və qardaşlıq ruhu ortaq prinsiplərimizin gücünü və Milli Cəmiyyətlərimiz arasında davamlı bağları bir daha sübut etdi.
Biz əminik ki, Türk Qızıl Aypara Cəmiyyəti ilə Azərbaycan Qızıl Aypara Cəmiyyəti arasında formalaşmış möhkəm tərəfdaşlıq əlaqələri gələcəkdə də ortaq məqsədlər uğrunda birgə fəaliyyətlərlə daha da dərinləşəcək. Humanitar Hərəkatın prinsiplərinə sadiq qalaraq, ehtiyac içində olan insanlara yardım əlimizi birlikdə uzadacağıq. Bu bizim həm humanitar, həm də milli borcumuzdur.
Bu əlamətdar gündə Türk Qızıl Aypara Cəmiyyətinin bütün kollektivini bir daha təbrik edir, Sizə və rəhbərlik etdiyiniz Cəmiyyətə davamlı uğurlar, qardaş Türkiyə xalqına isə rifah və əmin-amanlıq arzulayıram.
 
 
Hörmətlə,
Dr. Novruz Aslanov
Azərbaycan Qızıl Aypara Cəmiyyətinin Prezidenti,
Azərbaycan Respublikası Milli Məclisinin deputatı