AzQAC-ın Bakı şəhərinin Nizami rayonunda "İstidən qorunun – sağlam qalın!" adlı maarifləndirici kampaniyası

2025-ci il avqust ayının 25-də Azərbaycan Qızıl Aypara Cəmiyyəti (AzQAC) Bakı şəhərinin Nizami rayonunda "İstidən qorunun – sağlam qalın!" adlı maarifləndirici kampaniya həyata keçirilib. Bu davamlı təşəbbüsün əsas məqsədi əhalinin istilərlə bağlı risklərdən xəbərdar olması və özlərini qorumaq üçün vaxtında tədbir görməsidir.

Son illərdə iqlim dəyişiklikləri və yay aylarında artan temperatur nəticəsində isti hava dalğaları insan sağlamlığı üçün ciddi təhlükə yaradır. Bu xüsusilə yaşlı insanlar, uşaqlar, xroniki xəstəliyi olan şəxslər və açıq havada çalışanlar üçün daha böyük risklər deməkdir və əlavə təhlükə yarada bilər.

Tədbir AzQAC-ın Bakı Regional Mərkəzinin (RM) təşkilatçılığı, Nizami İcra Hakimiyyətinin dəstəyi və Bakı Regional Mərkəzə daxil olan rayon bölmələrinin sədrləri və könüllüləri iştirakı ilə keçirilib.  Onlar əhaliyə mövzu ilə bağlı 700 flayer və 1000 ədəd su paylayaraq, aşağıda qeyd olunan tövsiyyələrlə bölüşdülər.

- Günəşin altında uzun müddət qalmayın;

- Bol maye qəbul edin, qazlı və spirtli içkilərdən uzaq durun;

- Geyiminizə diqqət yetirin – açıq rəngli, nazik və nəfəsalan parçaları seçin;

- Özünüzlə su və günəşdən qoruyucu vasitələr gəzdirməyi unutmayın;

- Uşaqları və yaşlıları avtomobildə tək buraxmayın — bu, ölümcül ola bilər;

- Başgicəllənmə, halsızlıq, ürəkbulanma və qızdırma hiss etdikdə dərhal həkimə müraciət edin; 

- Əgər özünüzü pis hiss edirsinizsə və ya kiminsə köməyə ehtiyacı olduğunu görürsünüzsə — 103 təcili yardım xəttinə zəng edin.

Tədbirdə xatırladılıb ki, isti havalarda sağlam qalmaq hər bir insanın üzərinə düşən məsuliyyətdir. Özünü və yaxınlarını qorumaq üçün görülən sadə tədbirlər, əslində, böyük fəsadların qarşısını alan ən təsirli vasitədir.

Tədbirin sonunda AzQAC-ın Bakı RM-nin Koordinaturu Rəna İbrahimova, AzQAC-nin İcraçı Katibləri Elşən Səlimzadə (Fövqəladə Hallara Hazırlıq şöbəsinin müdiri) və Səbinə Məhbubi-İran (Sağlamlıq və Qayğı şöbəsinin müdiri) AzQAC-ın işçi heyəti və könüllülərə fəal iştirakları üçün təşəkkür bildirdilər.

Qeyd etmək lazımdır ki, belə silsilə tədbirlər təkcə Bakıda deyil, eyni zamanda digər bölgələrdə də təşkil olunmuş və ictimaiyyət tərəfindən müsbət qarşılanmışdır.