Bakı şəhərində Türk Qırmızı Şəbəkəsinin Prezidentlər Şurasının Görüşü keçirilib

Bakı şəhəri, 19 noyabr 2025-ci il

2025-ci il noyabrın 19-da Bakı şəhəri Türk Dövlətləri Təşkilatının (TDT) XI Zirvə Görüşündə təsdiq edilmiş Türk Qızıl Aypara Şəbəkəsinin (TQŞ) yüksək səviyyəli toplantısına ev sahibliyi etmişdir. Türk Qızıl Ay Şəbəkəsinə Azərbaycan, Türkiyə, Özbəkistan, Qazaxıstan və Qırğızıstan milli cəmiyyətləri daxildir. Tədbirə Türkmənistan Qızıl Aypara və Şimali Kipr Qızıl Ay Cəmiyyətləri müşahidə qismində qatılıb.

Tədbir proqramı ulu öndər Heydər Əliyevin Fəxri Xiyabanda məzarını, ölkəmizin müstəqilliyi və ərazi bütövlüyü uğrunda şəhid olmuş qəhrəmanların xatirəsinə ehtiram əlaməti olaraq Şəhidlər Xiyabanının və Türk Şəhidliyinin ziyarəti ilə başlamışdır.

TDT-yə üzv dövlətlərin Qızıl Aypara Cəmiyyətlərinin prezidentlər şurasının iştirakı ilə keçirilən görüşdə 2025-ci il üzrə fəaliyyətlərin yekun icmalı aparılmış, həmçinin, 2026-cı il üçün strateji istiqamətlər müəyyənləşdirilmişdir.

Qeyd edək ki, ötən il Bişkek şəhərində keçirilmiş görüş zamanı Türk dövlətlərinin Qızıl Aypara Cəmiyyətlərinin qərarı ilə “Qırmızı Şəbəkə” platforması təsis olunmuş və sədrlik Qırğızıstan Qızıl Aypara Cəmiyyəti tərəfindən həyata keçirilmişdir. Bu il baş tutan növbəti görüşdə sədrlik Azərbaycan Qızıl Aypara Cəmiyyətinə keçmişdir.

Toplantının əsas məqsədi TQŞ-in 2025-ci il üzrə fəaliyyətlərinin geniş təhlilinin aparılması, üzv Milli Cəmiyyətlər arasında humanitar sahədə əməkdaşlıq istiqamətində əldə olunmuş nəticələrin dəyərləndirilməsi və 2026-cı il üçün Fəaliyyət Planının formalaşdırılması olmuşdur. Görüş çərçivəsində qəbul ediləcək qərarlar gələn il həyata keçiriləcək birgə təşəbbüslərə strateji çərçivə verəcəkdir.

Tədbirin ilk sessiyasında iştirakçılara 2025-ci ildə həyata keçirilmiş layihələr, regional tərəfdaşlıq formatları və üzv Milli Cəmiyyətlər arasında humanitar koordinasiyanın gücləndirilməsinə xidmət edən fəaliyyətlər barədə geniş təqdimat edilmişdir.

Toplantının ikinci hissəsi 2026-cı ildə reallaşdırılması nəzərdə tutulan uzunmüddətli hədəflərin, prioritet fəaliyyət istiqamətlərinin və birgə öhdəliklərin müzakirəsinə həsr olunmuşdur. 2026-cı il üzrə Strateji Yol Xəritəsi Sorğusunun nəticələri nəzərə alınmaqla, Milli Cəmiyyət rəhbərləri iqlim dəyişiklikləri, fəlakətə hazırlıq və müdaxilə, innovasiya, rəqəmsallaşma və könüllülər ilə iş kimi tematik istiqamətlərin gələn ilin fəaliyyət planına inteqrasiyası barədə fikir mübadiləsi aparmışlar. Bu müzakirələrin, həmçinin, 2026-cı ildə Türkiyədə keçiriləcək TDT Zirvə Bəyannaməsinin humanitar bölməsinin hazırlanmasına töhfə verməsi nəzərdə tutulur.

Rəsmi açılış mərasimində Azərbaycan Qızıl Aypara Cəmiyyətinin prezidenti, Millət vəkili Novruz Aslanov, Azərbaycan Respublikasının Xarici İşlər Nazirinin müavini Samir Şərifov, Türk Dövlətləri Təşkilatının Baş katibi Kubanıçbek Omuraliyev, Türk Kızılay Başkanı Prof.Dr. Fatma Meriç Yılmaz, Qırğızıstan Qızıl Aypara Cəmiyyətinin prezidenti Çingiz Çakıpov, Qazaxıstan Qızıl Aypara Cəmiyyətinin prezidenti Yerkebek Argumbayev, Özbəkistan Qızıl Aypara Cəmiyyətinin sədri Zafarcon Raxmanov, Türkmənistan Qızıl Aypara Cəmiyyətinin sədri Maral Açilova  və Şimali Kipr Qızıl Ay Cəmiyyətinin prezidenti Sezai Sezen, çıxış etmişlər.

Sonrakı bölümdə Türk Kızılayın təmsilçisi Banu Ertuğrul tərəfindən 2025-ci il üzrə Türk Qızıl Aypara Şəbəkəsi İcmalı təqdim olunmuş və Türk Kızılayı Beynəlxalq Əlaqələr və Miqrasiya üzrə Baş Direktoru Alper Küçükün təqdimatı ilə TQŞ-in 2026-cı il üzrə Strateji Yol Xəritəsinə dair müzakirələr keçirilmişdir.

Tədbir, üzv Milli Cəmiyyətlər arasında qarşılıqlı əməkdaşlıq və həmrəyliyi təsdiq edən Türk Qızıl Aypara Şəbəkəsi Bəyannaməsinin imzalanması ilə yekunlaşmışdır. Daha sonra xatirə fotosu çəkilmiş və rəsmi hədiyyələr təqdim edilmişdir.