AzQAC Sumqayıt Regional Mərkəzi şəhid və qazi ailələri üçün Yeni il bayramı təşkil edib

2025-ci il dekabrın 27-də Azərbaycan Qızıl Aypara Cəmiyyəti Sumqayıt şəhər bölməsinin təşkilatçılığı, SOCAR Polymer MMC, Paşa Sığorta ASC və Paşa Həyat Sığorta ASC-nin maliyyə dəstəyi ilə Dünya Azərbaycanlılarının Həmrəyliyi Günü və Yeni 2026-cı ilin gəlişi münasibətilə şəhid və qazi ailələri, eləcə də hər iki valideynini itirmiş və sağlamlıq imkanları məhdud uşaqlar üçün bayram tədbiri təşkil edilib.

Tədbir Azərbaycan Respublikasının ərazi bütövlüyü uğrunda şəhid olmuş qəhrəmanların xatirəsinin bir dəqiqəlik sükutla yad edilməsi ilə başlanıb. Azərbaycan Qızıl Aypara Cəmiyyətinin Sumqayıt Regional Mərkəzinin koordinatoru Mətanət Məhərrəmova tədbiri açaraq qonaqları salamlayıb, bu cür sosial yönümlü tədbirlərin əhəmiyyətindən bəhs edib.

Millət vəkili Səbinə Salmanova və sponsor qurumların nümayəndələri çıxış edərək iştirakçıları Yeni il münasibətilə təbrik edib, şəhid və qazi ailələrinə göstərilən diqqətin davamlı olduğunu vurğulayıblar.
Tədbir bədii hissə ilə davam edib, Sumqayıt Musiqi Kollecinin “Digah” ansamblının ifaları, Şaxta Baba və nağıl qəhrəmanlarının çıxışları uşaqlara bayram sevinci yaşadıb. Sonda uşaqlara Yeni il hədiyyələri təqdim edilib, sponsor və tərəfdaşlara təşəkkürlər bildirilib.

Ümumilikdə tədbir çərçivəsində 180 uşaq sevindirilib, onlar üçün unudulmaz bayram əhval-ruhiyyəsi yaradılıb.