Sabirabad Regional Mərkəzi tərəfindən İlk Yardım və İlk Psixoloji Yardım üzrə təlim təşkil olunub

2026-cı il fevralın 11-də İmişli rayonunda AzQAC-ın Sabirabad Regional Mərkəzi tərəfindən mərkəzə daxil olan 7 rayon bölməsinin sədr və könüllüsünün iştirakı ilə 23 nəfərə İlk Yardım və İlk Psixoloji Yardım üzrə təlim-məşğələ təşkil olunub.

Tədbirin açılışında Regional Mərkəzin koordinatoru Vilayət Muradlı iştirakçıları salamlayaraq bu cür təşəbbüslərin regionlarda hazırlıq səviyyəsinin artırılması baxımından əhəmiyyətini vurğulayıb.

İcraçı Katibin müavini, Sağlamlıq şöbəsinin müdiri Səbinə Məhbubi-İran qeyd edib ki, Aran zonasına daxil olan rayonların coğrafi və iqlim xüsusiyyətləri nəzərə alınaraq əməkdaş və könüllülərin İlk Yardım və İlk Psixoloji Yardım üzrə bilik və bacarıqlarının artırılması xüsusi əhəmiyyət daşıyır və silsilə təlimlər bundan sonrada mütəmadi davam etdiriləcək.

Təlim AzQAC-ın İlk Yardım üzrə mütəxəssisi Dr. Şahın Biləndərli tərəfindən nəzəri və praktiki formada keçirilib. Hadisə yerinin qiymətləndirilməsi, zərərçəkənin ilkin müayinəsi, ürək-ağciyər reanimasiyası, qanaxma və yanıqlar zamanı ilkin müdaxilə, həmçinin tənəffüs yollarının yad cisimlə tıxanması mövzuları üzrə praktiki məşğələlər təşkil olunub.

İlk Psixoloji Yardım və Psixososial dəstək üzrə çıxışlarda fövqəladə hallar zamanı fiziki və psixoloji yardımın paralel göstərilməsinin vacibliyi vurğulanıb.

Tədbirin sonunda regional mərkəz və rayon bölmələrinə metodiki vəsaitlər və İlk Yardım ləvazimatları təqdim olunub, yaxın vaxtlarda əlavə təlimlərin keçirilməsinin planlaşdırıldığı bildirilib.