“Sevgi Boxçası” layihəsi çərçivəsində yeni analara mənəvi dəstək tədbiri keçirilib

2026-cı il fevralın 19-da Azərbaycan Qızıl Aypara Cəmiyyətinin Bakı Regional Mərkəzi və Nizami rayon bölməsinin birgə təşəbbüsü ilə “Sevgi Boxçası” humanitar tədbiri Referans Medical Groupun tərkibində fəaliyyət göstərən  “Leyla Medical Center“də təşkil edilib.

Ana və körpə sağlamlığının qorunmasına, analığın dəyərinin təbliğinə və qadınlara mənəvi dəstəyin göstərilməsinə həsr olunmuş tədbirdə 25 yeni ana iştirak edib. Layihənin məqsədi barədə məlumat verilib. Nizami rayon bölməsinin sədri Günay İbrahimova analara xoş arzularını çatdırıb. 

Bakı Regional Mərkəzinin sədr müavini Sara Şavaqatova analıq dövründə mənəvi dəstəyin əhəmiyyətini vurğulayıb, psixoloq Aybəniz Zaman doğuşdan sonrakı psixoloji vəziyyətlə bağlı tövsiyələr verib. Pediatr-neonatoloq Uzm. Dr. Kamil Şərifov ana südünün əhəmiyyəti və yenidoğulmuşlara düzgün qulluq barədə məlumat təqdim edib.

Tədbirin keçirilməsinə göstərilən dəstəyə görə  “Leyla Medical Center“in rəhbərliyinə və “Seni” şirkətinə təşəkkürümüzü bildiririk. Layihənin əsas məqsədi analara qayğı və diqqət hissini aşılamaq və ana-körpə sağlamlığının vacibliyini cəmiyyətə çatdırmaqdır.