Azərbaycan Qızıl Aypara Cəmiyyəti rəhbərliyi və əməkdaşları Xocalı soyqırımı qurbanlarının xatirəsini anıblar

2026-cı il fevralın 26-da Azərbaycan Qızıl Aypara Cəmiyyətinin rəhbərliyi və əməkdaşları Xocalı soyqırımı qurbanlarının xatirəsinə ucaldılmış abidəni ziyarət edərək faciə qurbanlarının əziz xatirəsini ehtiramla yad ediblər.

1992-ci il fevralın 25-dən 26-na keçən gecə baş vermiş Xocalı faciəsi Azərbaycan tarixinin ən ağrılı və faciəli səhifələrindən biridir. Həmin gecə Xocalı şəhəri silahlı hücuma məruz qalmış, nəticədə yüzlərlə dinc sakin — qadınlar, uşaqlar və ahıllar amansızlıqla qətlə yetirilmişdir. Bu hadisə xalqımızın yaddaşında dərin iz buraxaraq milli kədərin və ədalət uğrunda mübarizənin simvoluna çevrilmişdir.

Anım mərasimində iştirak edənlər abidə önünə gül dəstələri qoymuş, şəhidlərin xatirəsini bir dəqiqəlik sükutla yad etmişlər. Çıxış edənlər tariximizin bu qanlı səhifəsinin unudulmamasının, gələcək nəsillərə doğru və obyektiv şəkildə çatdırılmasının vacibliyini vurğulamışlar.

Azərbaycan Qızıl Aypara Cəmiyyəti humanizm və mərhəmət prinsiplərinə sadiq qalaraq hər zaman sülhün, həmrəyliyin və insan ləyaqətinin qorunmasının tərəfdarı olduğunu bildirir. Abidənin ziyarəti həm şəhidlərin ruhuna ehtiramın ifadəsi, həm də bu kimi faciələrin bir daha təkrarlanmaması naminə birlik və yaddaş çağırışı olmuşdur.