Azərbaycan Dövlət İqtisadi Universitetində (UNEC) Türk Dövlətləri Təşkilatının Qırmızı Şəbəkəsi və Azərbaycan Qızıl Aypara Cəmiyyətinin (AzQAC) Gənclər Şəbəkəsi çərçivəsində maarifləndirici görüş keçirilib

2026-cı il May ayının 26-da Azərbaycan Dövlət İqtisadi Universitetində (UNEC) Türk Dövlətləri Təşkilatının Qırmızı Şəbəkəsi və Azərbaycan Qızıl Aypara Cəmiyyətinin (AzQAC) Gənclər Şəbəkəsi çərçivəsində maarifləndirici görüş keçirilib. Tədbirin iştirakçıları UNEC-in Biznes və Menecment fakültəsinin tələbə və müəllim heyəti olub.

 

Tədbirin keçirilməsində universitetin əsas hədəf tələbə və müəllim heyətinə aşağıdakı platformalar barədə geniş məlumat çatdırmaq olub:

• Beynəlxalq Qırmızı Xaç və Qızıl Aypara (QXQA) Hərəkatının tarixi və prinsipləri
• Azərbaycan Qızıl Aypara Cəmiyyətinin humanitar fəaliyyəti
• Türk Dövlətləri Təşkilatına üzv olan Milli Cəmiyyətlərin Qırmızı Şəbəkəsi
• Qırmızı Şəbəkə nəzdində fəaliyyət göstərən Gənclər Şəbəkəsinin layihələri
• İlk Yardımın təqdimatı və bir neçə mühüm vərdişlərin təqdim olunması

 

Tədbirdə AzQAC-nin rəhbər nümayəndə heyəti növbəti şəxslərdən ibarət olub:

• Səbinə Məhbubi-İran – AzQAC İcraçı Katibinin müavini
• Xalidə İsgəndərova – AzQAC İcraçı Katibinin müavini
• Mətanət Məhərrəmova – AzQAC Sumqayıt Regional Mərkəzinin Koordinatoru
• Sumqayıt RM işçi və könüllü heyyəti
• Türk Şəbəkəsinin rəhbərliyi və üzvləri

 

Görüşü giriş sözü ilə UNEC Biznes və Menecment fakültəsinin katibi, iqtisadiyyat üzrə fəlsəfə doktoru Elxan Salayev açıb. E.Salayev öz çıxışında Azərbaycan Qızıl Aypara Cəmiyyətinin ölkəmizdəki çoxəsrlik humanitar missiyasına xüsusi toxunub. O qeyd edib ki, AzQAC yarandığı gündən bəri xalqımızın çətin anlarında hər zaman yanında olub, insanpərvərlik, xeyriyyəçilik və fədakarlıq dəyərlərini layiqincə qoruyub saxlayıb.  Fakültə katibi Türk Qırmızı şəbəkəsi kimi qurumların tələbələrin sosial məsuliyyət hissinin artırılmasında və könüllülük fəaliyyətində əvəzsiz rolunu vurğulayıb.

 

Görüşdə çıxış edən AzQAC-ın rəsmi nümayəndələri öz təqdimatlarında humanitar fəaliyyətin qlobal, regional və praktiki tərəflərinə toxunublar. Məruzəçilər ilk növbədə Beynəlxalq Qırmızı Xaç və Qızıl Aypara Hərəkatının 1863-cü ilə dayanan zəngin tarixindən və fəaliyyətin özəyini təşkil edən 7 fundamental prinsipdən (insanpərvərlik, qərəzsizlik, bitərəflik, müstəqillik, könüllü xidmət, vahidlik və ümumbəşərilik) bəhs ediblər. Bu xəttin davamı olaraq, 1920-ci ildə qurulan Azərbaycan Qızıl Aypara Cəmiyyətinin ölkə daxilindəki humanitar missiyası, böhran anlarında əhaliyə göstərdiyi yardımlar və sosial layihələri geniş şəkildə tələbələrin diqqətinə çatdırılıb. Regional əməkdaşlığın önəmini vurğulayan natiqlər, Türk Dövlətləri Təşkilatına üzv olan Milli Cəmiyyətlərin Qırmızı Şəbəkəsinin qardaş ölkələr arasında humanitar həmrəyliyi gücləndirmək məqsədilə atdığı addımlardan danışıblar. Xüsusilə bu platformanın nəzdində fəaliyyət göstərən Gənclər Şəbəkəsinin beynəlxalq layihələri, tələbə mübadilələri və sosial təşəbbüsləri haqqında məlumat verilərək, UNEC gəncləri bu qlobal şəbəkəyə inteqrasiya olmağa dəvət edilib.

Təqdimatın digər maraqlı və praktiki hissəsi isə İlk Yardıma həsr olunub; aparıcılar AzQAC-ın İlk Yardım Koordinatoru Dr. Şahin Biləndərli və Sumgayıt RM İY üzrə məsul şəxsi Lalə Cəlilzadə bədbəxt hadisələr və qəfil xəsarətlər zamanı insan həyatını xilas edə biləcək mühüm ilkin tibbi vərdişləri (tənəffüsün bərpası, ÜĞR, qanaxmanın dayandırılması və sınıqlar zamanı aparılan addımlar) əyani şəkildə nümayiş etdirərək gənclərdə bu həyati vərdişlərin formalaşmasının vacibliyini qeyd ediblər.

Görüşün sonunda Elxan Salayev yenidən söz alaraq yekun nitqi söyləyib, qonaqlara faydalı məlumatlar üçün təşəkkür edib və universitetlə cəmiyyət arasındakı gələcək əməkdaşlığın önəmini qeyd edib.

Tədbir boyu və tədbirin sonunda qonaqlar, universitet rəhbərliyi və tələbələr birlikdə xatirə şəkilləri çəkdilər.