Xankəndidə Maarifləndirici tədbirləri

2026-cı il avqustun 27-də Xankəndidə Azərbaycan Qızıl Aypara Cəmiyyəti tərəfindən “Mina təhlükəsizliyi” və “İstidən qorunun — sağlam qalın” mövzularında maarifləndirici tədbirləri keçirilib.

Tədbirlərin əsas məqsədi minalar və müharibənin partlayıcı qalıqları ilə bağlı riskləri əhaliyə çatdırmaq, təhlükəsiz davranış qaydalarını təşviq etmək və təsirə məruz qalmış ərazilərdə bədbəxt hadisələrin baş vermə ehtimalını azaltmaq üçün icmaların biliklərini gücləndirməkdir. Eyni zamanda, yay mövsümünün ən isti dövründə əhalinin sağlamlığının təhlükəyə məruz qala biləcəyini nəzərə alaraq, Cəmiyyət tərəfindən “İstidən qorunun — sağlam qalın” maarifləndirmə kampaniyası da paralel şəkildə təşkil edilib.

Azərbaycan Qızıl Aypara Cəmiyyətinin təşkilatçılığı ilə baş tutan tədbir Azərbaycan Respublikası Prezidentinin Xankəndi şəhəri, Ağdərə və Xocalı rayonları üzrə xüsusi nümayəndəliyinin dəstəyi ilə həyata keçirilib. Tədbirdə AzQAC-ın prezidenti, Milli Məclisin deputatı Novruz Aslanov, Baş Qərargahın əməkdaşların, həmçinin QAC Bərdə, Ağdam və Tərtər rayon bölmələrinin sədrləri və könüllüləri fəal iştirak edib.
Tədbirlər zamanı Azərbaycan Qızıl Aypara Cəmiyyətinin prezidenti Novruz Aslanov Xankəndinin sakinləri ilə geniş səviyyəli görüş keçirib. O, iştirakçıları salamlayaraq, AzQAC nümayəndə heyətinin  Xankəndi səfərinin məramını açıqlayıb, Cəmiyyətin humanitar fəaliyyətindən bəhs edib.  Səmimi və konstruktiv şəraitdə keçən görüşdə sakinlərin suallarına ətraflı cavablar verilib.

Daha sonra AzQAC-ın İcraçı katibin müavini, ‘’Mina və partlamamış hərbi sursatların təhlükələrinə dair maarifləndirmə’’ layihəsinin koordinatoru Məmməd Kətanov və Bərdə RB təlimdən keçmiş könüllüləri “Mina təhlükəsizliyi” mövzusunda təqdimatlar keçiriblər, iştirakçılara mövzu ilə bağlı ətraflı məlumat təqdim ediblər. İştirakçılara minalar və müharibənin partlayıcı qalıqları ilə bağlı risklər, təhlükəli əşyaların tanınması qaydaları, şübhəli sahələrlə qarşılaşdıqda göstərilməli düzgün davranış, belə hallar barədə müvafiq qurumlara məlumat vermə prosedurları və s. barədə ətraflı izahat verilib. Dəyirmi masa maarifləndirici xarakter daşımaqla yanaşı, iştirakçılara sual vermək və müzakirələrdə fəal iştirak etmək imkanı da yaradıb.

Eyni zamanda, Xankəndinin mərkəzi parkında Cəmiyyətə məxsus Qızıl Aypara loqolu çadır qurulub. Çadır ətrafında istivurma, dehidratasiya və digər isti hava ilə bağlı vəziyyətlər, habelə isti havada düzgün davranış qaydaları barədə izahatlar verilib, bir sıra ilk yardım nümayişləri təşkil edilib. Bundan əlavə, şəhər sakinləri arasında maarifləndirici materiallar və sərin su paylanılıb. Nəticədə tədbirlər çərçivəsində 200-dən artıq insan əhatə olunub.

Mina təhlükəsizliyi ilə bağlı məlumatlandırma və isti hava dövründə keçirilən bu qəbil preventiv tədbirlər Azərbaycan Qızıl Aypara Cəmiyyətinin icmaların gündəlik həyatında iştirakının vacib nümunələrindəndir. Sadə, lakin təsirli addımlar vətəndaşların təhlükəsizliyinin və sağlamlığının qorunmasında mühüm rol oynayır.

Azərbaycan Qızıl Aypara Cəmiyyəti belə maarifləndirici və dəstək kampaniyalarını ölkənin paytaxtı Bakıda, eləcə də digər regionlarda — Sumqayıt, Abşeron, Siyəzən, Qobustan, Şamaxı, Mingəçevir, Bərdə, Tərtər, Ağdam, Gəncə, Gədəbəy, Qazax, Lənkəran, Cəlilabad və Astarada  artıq həyata keçirmişdir.