“Sağlam yaşlanma” mövzusunda tədbir

2026-cı il oktyabrın 8-də Səhiyyə Nazirliyinin İctimai Səhiyyə və İslahatlar Mərkəzi (İSİM), Bakı Şəhər Herontoloji Mərkəzi və Azərbaycan Qızıl Aypara Cəmiyyətinin birgə təşkilatçılığı ilə ahıl şəxslər üçün maarifləndirici tədbir keçirilib. Tədbirdə “Üçüncü Bahar” İctimai Birliyinin və “Qadın İnkişaf Mərkəzi” İctimai Birliyinin üzvləri iştirak ediblər.

Tədbirin əsas məqsədi sağlam və aktiv yaşlanmanın təşviqi, yaşlı insanların həyat keyfiyyətinin yaxşılaşdırılması və uzunömürlülüyün dəstəklənməsi ilə bağlı məlumatlılığın artırılması olub.

 

İSİM-in direktoru Səbinə Babazadə giriş sözü ilə çıxış edərək, yaşlı insanların tibbi xidmətlərə əlçatanlığının təmin olunması, sağlamlıq göstəricilərinin yaxşılaşdırılması istiqamətində ölkəmizdə görülən işlərdən söz açıb. O, müəyyən yaşa dolmuş şəxslərin fiziki, psixoloji və sosial rifahının, eləcə də cəmiyyətdə fəal rolunun qorunmasının mühüm əhəmiyyət daşıdığını bildirib. Əhalinin yaşlanması bu gün dünyanın bir çox ölkəsində olduğu kimi Azərbaycanda da sağlamlığın qorunması və ictimai səhiyyə siyasətində diqqət tələb edən mühüm istiqamətdir.

 

İSİM-in Layihələrin əlaqələndirilməsi şöbəsinin müdiri Leyla Cəfərli düzgün qidalanmanın, aktiv həyat tərzinin hər yaşda sağlam və gümrah olmaq üçün əsas rol oynadığını vurğulayıb. O, İSİM-in təşəbbüsü ilə yaradılan və müxtəlif qurumların nümayəndələrinin təmsil olunduğu “Sağlam yaşlanma” Təşəbbüs Qrupunun fəaliyyəti barədə məlumat verib, cəmiyyətdə sağlam və aktiv yaşlanma mədəniyyətinin təşviqinə yönəlmiş tədbirlərin keçirildiyini diqqətə çatdırıb.

İSİM-in Təlim-resurs şöbəsinin müdir müavini Pərvin Quliyeva “Sağlam yaşlanma – praktik tövsiyələr” mövzusunda təqdimatla çıxış edib. O, sağlam yaşlanmanın əsas prinsipləri, gündəlik həyatda sağlamlığın qorunması və yaşlılıq dövründə həyat keyfiyyətinin yüksəldilməsi ilə bağlı praktik tövsiyələri diqqətə çatdırıb. Bakı Şəhər Herontoloji Mərkəzinin direktor vəzifəsini müvəqqəti icra edən Nailə Əhmədova çıxışında bir daha vurğulayıb ki, qocalıq bir nemətdir. O, qocalıq anlayışı ilə bağlı cəmiyyətdə formalaşmış münasibətdən və yaşlılıq dövrünün xüsusiyyətlərindən söz açıb.

 

Azərbaycan Qızıl Aypara Cəmiyyətinin İcraçı katibinin müavini Səbinə Məhbubi-İran

“Sağlam yaşlanma proqramına dair – Beynəlxalq Qızıl Xaç və Qızıl Aypara Cəmiyyətləri Federasiyasının təcrübəsi” mövzusunda təqdimatla çıxış edib. O, öz çıxışında Federasiyanın 2030-cu illər üçün “Sağlam Yaşlanma” Strategiyası, Əməlliyat Çərçivəsi və bu sənədlərin tətbiqinə kömək edən Praktik alətlər toplusu programını tədbir iştirakçılarına təqdim edib. Nitq zamanı yaşlı insanların fəal, sağlam və cəmiyyətdə layiqli yer tutaraq yaşamasının önəmli olması vurğulnıb. Sənədlər  Milli Cəmiyyətlər və Federasiyanın  Katibliyinə bu sahədə gələcək fəaliyyətləri planlaşdırmağa imkan yaradır. Təqdimatın davamı olaraq AzQAC-nin digər tərəfdaşlarla birğə təşkil olunan və iştirak edən  fəaliyyətlərdən nümunələr göstərildi.

 

Azərbaycan Respublikası Elm və Təhsil Nazirliyinin Canlı Sistemlərin Tədqiqi İnstitutunun “Bioherontologiya və inkişaf” laboratoriyasının müdiri, biologiya üzrə fəlsəfə doktoru Natəvan Kərəmova “Uzunömürlülük və sağlamlıq göstəricilərinin qorunması yolları” mövzusunda təqdimatla çıxış edib. O, sağlam və uzun ömürə təsir edən amillər, həmçinin sağlam yaşlanmanın elmi əsasları barədə məlumatları iştirakçıların diqqətinə çatdırıb.

 

Tədbir çərçivəsində iştirakçılar arasında qeyri-infeksion xəstəliklərin inkişafı üzrə risklərin qiymətləndirilməsinə dair sorğu keçirilib və viktorina təşkil olunub. AzQAC “İcmaya əsaslanan sağlamlıq’’ proqramının mütəxəssisi Mətanət Qaraxanova iştirakçılara sorğunun məqsədini izah edərək, sorğunun Federasiya tərəfindən hazırlanan “Sağlam yaşlanma” alətlər toplusunun tərkib hissəsi olduğunu qeyd edib. Sorğu hər iştirakçıya öz sağlamlığının vəziyyətini fərdi qaydada qiymətləndirmək imkanını yaradır.

 

Bütün iştirakçılar belə tədbirlərin ahıl insanların həyat keyfiyyətinin yaxşılaşdırılması və cəmiyyətdə yaşlı nəslə diqqətin artırılması baxımından əhəmiyyətini vurğuladılar.