2026-cı il noyabrın 4-də Azərbaycan Dövlət Pedaqoji Universitetində (ADPU) “Ümumi Pedaqogika” kafedrasının təşkilatçılığı ilə Azərbaycan Qızıl Aypara Cəmiyyəti ilə birgə (AzQAC) “Gənclərin vətənpərvərlik tərbiyəsində sosial-humanitar fəaliyyətin rolu” mövzusunda elmi seminar keçirilib.
Tədbiri giriş sözü ilə açan “Ümumi
Pedaqogika” kafedrasının müdiri, dosent
Fəridə Xudiyeva ilk dəfə elmi seminarın nəzəriyyə ilə təcrübənin vəhdəti
şəraitində keçirildiyini önə çəkərək, bu mövzunun aktuallığından söz açmış, AzQAC-a
minnətdarlıq ifadə etmişdir.
Azərbaycan Qızıl Aypara Cəmiyyətinin
vitse-prezidenti, əməkdar jurnalist, pedaqogika üzrə fəlsəfə doktoru, dosent Qafar Əsgərzadə elmi seminarda geniş məruzə ilə çıxış etmişdir.
Məruzəçi gənclərin vətənpərvərlik ruhunda formalaşmasında sosial-humanitar
fəaliyyətin rolundan bəhs edib. O, xüsusilə AzQAC-ın bu sahədə fəaliyyətinin
pedaqoji proseslə əlaqələrini vurğulayıb.
Qafar Əsgərzadə həmçinin, Beynəlxalq
Qızıl Xaç və Qızıl Aypara Hərəkatının, AzQAC-ın yaranma tarixi, fəaliyyəti və əsas
prinsipləri, eləcə də gənclərin vətənpərvərlik tərbiyəsində sosial-humanitar
fəaliyyətin əhəmiyyəti barədə ətraflı məlumat verib.
Daha sonra Azərbaycan Qızıl Aypara
Cəmiyyətinin icraçı katibinin müavini Səbinə Məhbubi-İran sosial-humanitar
fəaliyyətin Qızıl Aypara Cəmiyyətinin yanaşmasında əhatə etdiyi əsas
istiqamətlərdən danışıb, bu sahədə həyata keçirilən fəaliyyətlər və təşəbbüslər
barədə məlumat verib. O, həmçinin ilk yardım üzrə könüllülərlə praktiki nümayiş
keçirərək ilkin yardım bilik və bacarıqlarının gündəlik həyatda əhəmiyyətini
diqqətə çatdırıb.
Seminar iştirakçıların mövzu
ətrafında fikir mübadiləsi aparması, suallarının cavablandırılması və
müzakirələrlə davam etdirilib.
Məruzələr ətrafında çıxış edən P.ü.f.d,
dos. Sahilə Orucova, müəllimlər Pakizə Cavadzadə, Ramilə İsmayılxanova, Gülər
Nuriyeva gənclər arasında humanitar dəyərlərin təşviqi, könüllülük fəaliyyətinə
marağın artırılması, eləcə də onların vətənpərvərlik ruhunda formalaşmasında
sosial-humanitar fəaliyyətin əhəmiyyətindən söz açaraq, belə tədbirlərin mütəmadi olaraq
keçirilməsinin vacibliyi önə çəkilib.
Seminarda Azərbaycan Qızıl Aypara Cəmiyyətinin əməkdaşları və könüllüləri, eləcə də universitetin kafedra müdirləri, professor-müəllim heyəti, doktorantlar, magistrantlar və tələbələr iştirak ediblər.
