AzQAC-ın könüllüləri və işçiləri üçün keçirilən bir günlük "İlkin Psixoloji Yardımın (İPY) əsasları" təlimin davamı

2026-cı il noyabrın 5-də “SAFER-AZ proqramı: Azərbaycanda təhlükəsiz və dayanıqlı icmalar – Proqnozlaşdırma, Erkən fəaliyyət və Dayanıqlılığın gücləndirilməsi” çərçivəsində Azərbaycan Qızıl Aypara Cəmiyyətinin (AzQAC) könüllüləri və işçiləri (Bərdə RB, Tərtər RB, Ağdam RB, Fizuli RB) üçün keçirilən növbəti bir günlük "İlkin Psixoloji Yardımın (İPY) əsasları" təlimi uğurla həyata keçirilib. Təlim Bərdədə, “Şuça” otelində təşkil edilmişdir. Təlimin əsnasında iştirakçılara böhran anlarında psixoloji dəstək göstərmək üçün fundamental bacarıqlar aşılanmışdır.

 

Məlumat üçün bildirmək istərdik ki, SAFER-AZ proqramı AzQAC və Beynəlxalq Qızıl Xaç və Qızıl Aypara Cəmiyyətləri Federasiyası (Beynəlxalq Federasiya) tərəfindən birgə Avropa Birliyinin maliyyə dəstəyi ilə həyata keçirilir.

 

Bundan öncə olan təlimdəki kimi tədbir iştirakçılarına tanışlığ və təlimdən gözləntilərin ifadə olunması üçün imkan yaradılmışdır. İlk sessiyalarda aparıcı mütəxəssis Olga Rusakova (Beynəlxalq Federasiyanın psixososial dəstək üzrə məsləhətçisi) İPY-nin tərifini vermiş, iştirakçıların biliklərini interaktiv şəkildə tətbiq etməsinə şərait yaratmış, könüllülərə stress yaşayan insanların emosional və fiziki mərhələləri, eləcə də böhrana müxtəlif reaksiyalar barədə məlumat ötürmüşdür.

 

Təlimin özəyini İlkin Psixoloji Yardımın üç əsas hərəkət prinsipi təşkil etmişdir:

·  Diqqət yetir: Təhlükəsizliyin qiymətləndirilməsi, təcili aşkar ehtiyacları olan və şiddətli distress reaksiyaları göstərən insanların müəyyən edilməsi;

· Dinlə: Ehtiyac sahiblərinə yaxınlaşma, onların ehtiyac və narahatlıqlarını soruşma, həmçinin onları sakitləşdirmək üçün fəal dinləmə metodlarının tətbiqi;

·   Əlaqələndir: İnsanlara əsas ehtiyaclarına (su, qida, sığınacaq) çatmaqda kömək etmə, yaxınları ilə əlaqə qurmalarını təmin etmə və onları rəsmi dəstək mexanizmlərinə yönləndirmə.

 

Günün ikinci yarısında öyrənilənlər real ssenarilər və simulyasiyalarla möhkəmləndirilmiş, qrup işlərində böhran reaksiyalarına yanaşma sınaqdan keçirilmiş, “Dəstəyi hiss et” məşqi ilə empatiya inkişaf etdirilmiş, uşaqlar üçün İPY-nin xüsusiyyətləri və yaşa uyğun ünsiyyət strategiyaları müzakirə edilmişdir. Başqalarına kömək edərkən tükənməmək və psixoloji dayanıqlığı qorumaq, İPY-nin ən mühüm şərtlərindən biridir. Bu səbəbdən proqramın yekun hissəsi "Özünə qayğı" mövzusuna həsr olunmuşdur. Könüllü və işçilərin öz stress səviyyələrini idarə etməsi, humanitar fəaliyyət zamanı psixoloji gigiyenanı qoruması və ikincili travmalardan yayınması üçün effektiv metodlar tədris edilmişdir.

 

İntensiv və interaktiv keçən təlimin sonunda iştirakçılar tərəfindən yekun qiymətləndirilmə aparılmış, qazanılmış bilik və bacarıqların sahə fəaliyyətində tətbiqi imkanlarına dair rəy və təkliflər dinlənilmişdir.

 

Bu təlim sayəsində Qızıl Aypara Cəmiyyətinin potensialı daha da güclənmiş, böhran vəziyyətlərində icmalara peşəkar, humanist və çevik humanitar dəstək göstərməyə hazır olan yeni bir mütəxəssis heyəti formalaşdırılmışdır.