2026-cı il noyabrın 11-də Siyəzən rayonunun Həmyə kəndində
SAFER-AZ proqramı çərçivəsində icma qrupu ilə məlumatlandırma və məsləhətləşmə
görüşü keçirilmişdir.
Üç saat davam edən görüşün şüarı “Daha
hazırlıqlı və təhlükəsiz icmalar” olmuşdur. Tədbirin əsas məqsədi SAFER-AZ
proqramını və onun fəaliyyət istiqamətlərini təqdim etmək, yerli risklər və
icmanın mövcud potensialı barədə ilkin məlumat toplamaq, həmçinin, icmanın
layihə prosesində fəal iştirakını və gələcək əməkdaşlığı təşviq etmək olmuşdur.
Görüş iştirakçıların qeydiyyatı və təqdimatı ilə
başlamışdır. Açılış hissəsində Həmyə kəndinin icra nümayəndəsi qonaqları salamlayaraq irəli sürülən təşəbbüsün
vacibliyini vurğulamış və icma üzvlərini tədbirdə fəal iştirak etməyə dəvət
etmişdir.
Açılışın ardından AzQAC-ın nümayəndə heyəti Beynəlxalq
Qızıl Xaç və Qızıl Aypara Hərəkatı, eləcə də Hərəkat daxilində icmalarla
aparılan işlər barədə ətraflı məlumat vermişdir. Daha sonra Beynəlxalq
Federasiyanın əməkdaşları tərəfindən SAFER-AZ proqramına dair təqdimat
keçirilmişdir. Çıxışlarda proqramın uğurla icra olunması üçün məhz icma üzvlərinin
təşəbbüskarlığının əsas rol oynadığı xüsusi qeyd edilmişdir.
Təqdimatlar və verilən izahatlar əsasında icma
üzvləri ilə aşağıdakı mövzular üzrə ətraflı müzakirələr aparıldımışdır:
• icmanın risklərinin qiymətləndirilməsi, planlaşdırma və hazırlıq prosesində
iştirakı;
• yerli təhlükələr, risk altında olan qruplar və mövcud potensial;
• erkən xəbərdarlıq, erkən fəaliyyət və icma hazırlıq planları.
Şifahi sorğular əsasında keçirilən müzakirələrdə
iştirakçılara Həmyə kəndi, sakinlərin üzləşdiyi təbii fəlakətlər və hansı təhlükələrin
daha çox risk yaratdığı barədə məlumatları bölüşmək imkanı yaradılmışdır. Eyni
zamanda, mövcud xəbərdarlıq sistemi, fəlakətlərə qarşı hazırlıq səviyyəsi, həssas
qruplar (kimin daha çətin vəziyyətdə qala biləcəyi) və icmanın malik olduğu
potensial imkanları araşdırılaraq iştirakçıların rəy və təklifləri
toplanılmışdır.
Təşkilatçılar vurğulamışlar ki, bu görüş ilkin məlumatlandırma
və məsləhətləşmə xarakteri daşıyır. Hər bir icmada gələcəkdə görüləcək fəaliyyətlər
məhz yerli risklərin təhlili, birgə məsləhətləşmələr və mövcud resurslar əsasında
müəyyən olunacaqdır. Beləliklə, keçirilən bu tədbir gələcək birgə fəaliyyət
planının qurulması üçün mühüm başlanğıc olmuşdur.
Görüşün sonunda icma üzvləri belə aktual və həyati əhəmiyyətli
mövzuya diqqət ayırdıqlarına, kənd sakinlərinin rəy və təkliflərini dinlədiklərinə
görə təşkilatçılara dərin təşəkkürlərini bildirmişlər. Bütün iştirakçılar bu
cür maarifləndirici təşəbbüslərin icmanın təhlükəsizliyi və fəlakətlərə
hazırlığı baxımından müstəsna rol oynadığını qeyd edərək, proqram çərçivəsində
keçiriləcək növbəti mərhələlərdə, təlim və görüşlərdə də böyük məmnuniyyətlə və
fəal şəkildə iştirak etmək arzularını ifadə etdilər.
Görüşdə icma üzvləri (Həmyə kəndinin sakinləri), kənd
icra nümayəndəliyi və bələdiyyəsinin təmsilçiləri, eləcə də Azərbaycan Qızıl
Aypara Cəmiyyəti (AzQAC) və Beynəlxalq Qızıl Xaç və Qızıl Aypara Cəmiyyətləri
Federasiyasının (BQXQAF) əməkdaşları iştirak etmişlər.
